رسميًا انطلاق خدمة الوصول للتطبيقات البنكية بدون إنترنت اليك طريقة الاستخدام
▫️يعني شنو خدمة USSD؟
الـUSSD هي خدمة بتخليك تستخدم الخدمات المصرفية من الموبايل العادي بدون إنترنت ، الزول بيدخل كود زي *123# مثلاً، وبتطلع ليهو قائمة فيها خدمات زي: الاستعلام عن الرصيد، تحويل القروش، دفع الفواتير أو شراء الخدمات ،الطريقة دي شغالة مباشرة عبر شبكة الاتصالات.
▫️ليه السودان اتجه لخدمة USSD؟
في السودان جزء كبير من الناس ما عندهم إنترنت ثابت أو موبايلات ذكية، لكن عندهم موبايلات عادية وشريحة اتصال، عشان كده الـUSSD بتعتبر حل عملي لأنها:
- بتشتغل بدون إنترنت.
- بتشتغل في أي موبايل حتى البسيط.
- بتوصل الخدمات المصرفية للمناطق البعيدة والقرى.
- بتدعم فكرة الشمول المالي، يعني إدخال عدد أكبر من الناس في النظام المصرفي.
-و بتقلل استخدام الكاش البيتم الحفاظ عليهو داخل المصارف
كمان في الظروف الحالية للسودان، البنوك محتاجة وسائل سريعة وسهلة لتحويل الأموال ودفع الخدمات بدون الحاجة للذهاب للفروع.
▫️الخدمة دي حتعمل شنو؟
المتوقع إنو خدمة USSD تقدم مجموعة من الخدمات الأساسية، زي:
- معرفة الرصيد في الحساب.
- تحويل الأموال بين الحسابات أو المحافظ.
- دفع الفواتير والخدمات.
- شراء الرصيد أو خدمات الاتصالات.
وده بيساعد في تقليل التعامل بالكاش ويسهّل المعاملات اليومية.
▫️كيف بتشتغل الخدمة؟
العملية كلها بتكون مشتركة بين أكثر من جهة:
- شركة الاتصالات بتوفر قناة الـUSSD نفسها والكود.
- البنك أو شركة الدفع بتوفر الخدمات المالية (تحويل، استعلام، دفع).
- الجهات التنظيمية زي بنك السودان وجهاز الاتصالات بتنظم العملية وتضع ضوابط الأمان.
لما الزول يكتب الكود في موبايلو، الطلب بيمشي عبر شبكة الاتصالات للنظام المصرفي، والبنك ينفذ العملية ويرجع النتيجة للمستخدم في نفس اللحظة.
▫️تحية للانجاز المتأخر دا
إدخال خدمة USSD في السودان خطوة مهمة لتوسيع الخدمات المصرفية الرقمية، لأنها بتعتمد على الموبايل العادي وما محتاجة إنترنت، ومع انتشار الموبايلات في السودان، التقنية دي ممكن تلعب دور كبير في تسهيل التحويلات اليومية وتقريب الخدمات المالية للناس في المدن والأقاليم.
