قمة السلام..قصيدة بشري إبراهيم في قمة السلام بالجنينة

 

بشري إبراهيم

الشاعر بشري إبراهيم 

مشاركة بقصيدة في قمة السلام بالجنينة

.:قالي وطني ها القبليه هدت حيلتي

نحن ونحن هلكتني وعدمت قليلتي 

انا عن نفسي م بتشبهني لاها خصيلتي 

واي قبيله في السودان بشوفه قبيلتي

كان م قبلنا بعضنا مافي اي اجابه

اصابع اليد جميعا بتشبه السبابه

معروف الشرار  بتورو الهبابه

مطيرق الشوره اقوي كتير من الدبابه

.: لا تحشر دول لا واسطة التوريكا 

لا دولار بينفع لا بنوك لا شبكه

قطنا وفيتريتتنا وعجين الريكه

نحن مصممين للكسره بملاح ويكه

: جينا الليله هازين فوق خيول ونحاس

 قاصدين التلوب ومعادن الفراس

نتعاهد عهد ناس حمزه والعباس

نشيل بدل الكلاشن مسطره وكراس

 .: ارح الليله نتقالد مواطن وديش

نتسامح جميع كل زول يقول معليش

اليبدا المزارع اسو  بليلة العيش

والراعي اليجيب لبنو ويسوها كنيش

.: لازم ننصهر نتعافا ننسي الفات

نطري المولي نتقربلو بالصلوات

مهم يا ابواتي نتفاده الفتن كان جات

لكين الأهم   تسلمو السلحات

 الجنه الجنينه والجنينه الجنه 

الغيم البهتف والحوار الطنه 

جبالكن مخدر والهزار الغنا

الوادي البيهدر والسحاب اتني

محتار فكري يا الباقيين حدار لي وطنا

انا م شفت زول بكبرلو نار في الجنه

.: نفتخر افتخار لامن ندفقو عديييل

كوننا من قوف طابيه ملاقي النيل

قال سوداني عقب العزه شن بتشيل

حرم فوقو الا  يكون صحابي جليل

: طيبين كالنسيم مرنين كما الحنقوق

لكين أن عكرنا عقب ولا بنروق

الأعمار دي كان م اتحددت من فوق

طلاق في بيتي م نموت اصلو لي مخلوق